Fréttir

Sunnuhlíð hjúkrunarheimili Kópavogi – Endurbætur og stækkun

Wed, 21 Jan 2026 12:27:41 GMT

JTV fyrir hönd Vigdísarholts ehf, kt. 580214-1180, óskar eftir tilboðum í verkið:

"Sunnuhlíð - Lundur stækkun"

Verkið felur í sér að endurnýja og stækka deildina Lund á hjúkrunarheimilinu Sunnuhlíð í Kópavogi. Stærð deildarinnar er um 400 m2. Verkið felur m.a. í sér eftirfarandi verkþætti:

• Niðurrif á útvegg og þaki sem og öllu innandyra auk múrbrots og fræsinga fyrir nýjum lögnum og undirstöðum

• Jarðvinnu fyrir stækkun húss og endurnýjun lagna í jörðu

• Uppbyggingu nýrra burðarvirkja og tengingu við núverandi hús

• Nýjar lagnir, raflagnir og loftræsingu auk tengingar á sprinklerkerfi

• Allan frágang utan- og innanhúss

Full starfsemi verður á hjúkrunarheimilinu meðan á framkvæmdum stendur og skal verktaki taka fullt tillit til viðkvæmrar starfsemi þess. Verklok eru 27. nóvember 2026.

Hér er um almennt útboð að ræða sbr. lög um opinber innkaup nr. 120/2016 (OIL) þar sem ótilteknum fjölda er með auglýsingu gefinn kostur á að gera tilboð. Útboðið er auglýst innanlands.

Gögn verða afhent á rafrænu formi frá og með mánudeginum 19. janúar 2026. Þeir sem hyggjast gera tilboð í verkið skulu hafa samband við Fjalar Hauksson hjá JTV ehf með því að senda tölvupóst á netfangið fjalar@jtv.is og gefa upp nafn, nafn fyrirtækis, síma og netfang og fá í kjölfarið aðgang að útboðsgögnum á verkefnavef verkefnisins.

Fyrirspurnir merktar tilboðinu skulu sendar umsjónarmanni útboðs í gegnum verkefnavef verkefnisins eða í tölvupósti á netfangið fjalar@jtv.is . Fyrirspurnir skulu berast í síðasta lagi 16. febrúar 2026. Fyrirspurnir og samhljóða svör verða birt á verkefnavef innan þess frests sem tilgreindur er í útboðs- og samningsskilmálum og teljast þau hluti útboðsgagna.

Tilboðum skal skila rafrænt á verkefnavef verkefnisins fyrir kl 14:00 þann 24. febrúar 2026.

Góð stjórnun er ekki lúxus – heldur nauðsyn

Fri, 07 Nov 2025 15:04:19 GMT

Góð stjórnun er ekki lúxus – heldur nauðsyn

Nýleg umfjöllun í Kastljósi um galla í nýbyggingum vakti athygli á því sem margir hafa fundið á eigin skinni: of stór hluti nýrra íbúða kemur ekki gallalaus úr verksmiðjunni, eða öllu heldur af byggingarsvæðinu. Samkvæmt nýrri rannsókn, sem Stefán Hrafn Jónsson prófessor í félagsfræði við HÍ kynnti í þættinum, þurfa um 40% húsfélaga í nýbyggðum fjölbýlishúsum að bera kostnað vegna galla – vandamál sem valda íbúum bæði fjárhagslegum og andlegum áföllum.

Þetta er ekki tilviljun. Þetta eru einkenni kerfis sem skortir agaða framkvæmdastjórnun, skýra verkferla og sameiginlega ábyrgð á öllum stigum verkefnisins.

Jónas Halldórsson, framkvæmdastjóri JTV, orðaði þetta þannig í viðtali við Viðskiptablaðið:

„Eins og við vitum er grunnur að öllum byggingum góðir hönnuðir, ekki er hægt að treysta á tilviljanir – sama gildir um framkvæmdastjórnun.“

Góð stjórnun er ekki lúxus. Hún er forsenda árangurs. Með markvissri og faglegri stjórn aukum við líkurnar á að verkefni nái markmiðum sínum, hvort sem það er varðandi gæði, tíma eða kostnað.

Á Íslandi stendur byggingariðnaðurinn á miklum tímamótum. Fram undan eru stór verkefni á sviði innviða, íbúðarhúsnæðis og atvinnumannvirkja. Slík verkefni fela alltaf í sér áhættu: tafir, aukinn kostnað og galla sem geta fylgt verkefninu árum saman ef ekki er tekið á þeim frá upphafi.

Þar kemur góð verkefnastjórnun – eða framkvæmdastjórnun eins og JTV kallar þetta hlutverk – til sögunnar. Hún byggist á skipulagi, samhæfingu og ábyrgð. Hún tryggir að ákvarðanir séu teknar á réttum tíma, að upplýsingaflæði milli verkkaupa, hönnuða og verktaka sé skýrt og að eftirfylgni með gæðum sé stöðug.

Þegar framkvæmdastjórnun er faglega unnin minnka líkur á mistökum og ófyrirséðum vandamálum. Það sparar bæði tíma og fé, en ekki síst skapar það traust.

Það er þetta traust sem þarf að endurbyggja í íslenskri byggingarstarfsemi. Þegar neytendur heyra endurtekið um leka, skekkju í gólfum eða mistök í frágangi, minnkar trúin á kerfið. En með faglegri framkvæmdastjórnun – þar sem gæði og gagnsæi eru leiðarljós – aukast líkurnar á að hægt sé snúa þeirri þróun við.

Hjá JTV höfum við séð þetta í framkvæmd. Með skipulögðum vinnubrögðum, stöðugum umbótum og notkun tækni í þágu verkefna, höfum við byggt upp aðferðafræði sem tryggir bæði gæði og ábyrgð. Góð stjórnun er ekki lúxus. Hún er nauðsyn. Hún er grunnurinn að betra byggingarumhverfi, sterkari iðnaði og heimilum sem standast tímans tönn.

Góð stjórnun ekki lúxus heldur nauðsyn

Thu, 06 Nov 2025 18:29:23 GMT

Fyrsti módúlaleikskóli í Hafnarfirði rís við Áshamar 9

„Með markvissri og faglegri stjórn aukum við líkurnar á að verkefni nái markmiðum sínum.“

Ráðstefna um verkefnastjórnun í framkvæmdaverkum 2025 verður haldin á Reykjavik Hilton Nordica 30. október. Tilgangurinn með ráðstefnunni er að vekja athygli á mikilvægi fagmennsku í framkvæmdastjórnun á Íslandi að sögn Jónasar Halldórssonar, framkvæmdastjóra JTV, sem heldur ráðstefnuna.

„Eins og við vitum er grunnur að öllum byggingum eru góðir hönnuðir, ekki er hægt að treysta á tilviljanir, sama gildir um framkvæmdastjórnun. Góð stjórnun er ekki lúxus heldur nauðsyn, hún er lykilforsenda þess að framkvæmdir verði vel heppnaðar," segir Jónas.

Hann bendir á að Ísland standi frammi fyrir miklum framkvæmdum á næstu árum, allt frá innviðum og opinberum framkvæmdum til íbúðauppbyggingar og atvinnumannvirkja.

„Reynslan sýnir að á öllum stigum framkvæmda geta komið upp áskoranir: tafir, kostnaðarfrávik, gæðavandamál og ófyrirséðar aðstæður. Líkt og nauðsynlegt er að byggingar séu hannaðar og gerðar af fagfólki, er einnig þörf á faglegri verkefnastjórnun í framkvæmdaverkum.

Með markvissri og faglegri stjórn aukum við líkurnar á að verkefni nái markmiðum sínum, minnkum hættuna á mistökum og tryggjum meiri gæði fyrir verkkaupa, iðnaðinn og samfélagið í heild," segir Jónas .

„Oft er talað um að til að bæta gæði bygginga sé þörf á góðu eftirliti, sem er gott. En það skiptir ekki síður máli að ferlið í hönnun og framkvæmd sé gert faglega. Í raun snýst verkefnastjórnun um að skipuleggja og undirbúa, til þess höfum við ferla. En við erum aðallega að þjálfa okkur upp í að bregðast rétt við í aðstæðum sem upp koma. Og til þess þurfum við verkfærakistu og þjálfun. Svona ráðstefna er einn lítill hlekkur í þeirri viðleitni," segir hann.

Ræðumenn á ráðstefnunni eru Stephen DeVito frá Procon Consulting, Ólafur Daníelsson frá ÓD ráðgjöf, Andrea S. Rutledge, Construction Management Association of America, Jón Kolbeinn, framkvæmdastjóri framkvæmda hjá Reitum, og Vala Björnsdóttir, partner og verkefnastjóri hjá JTV. Ráðstefnustjóri er Brynja Þorgeirsdóttir.

Hann bætir við að markmiðið sé að gera framkvæmdastjórnun að enn öflugra fagi á Íslandi og styrkja þannig gæði, skilvirkni og áreiðanleika í öllum framkvæmdum. Að auka vitundavakningu um nauðsyn faglegrar stjórnunar. Jónas segir að einnig þurfi að auka þekkingu stjórnenda, hafa fleiri tæki og tól í verkfærakistunni.

Fyrsti módúlaleikskóli í Hafnarfirði rís við Áshamar

Tue, 20 May 2025 15:58:00 GMT

Fyrsti módúlaleikskóli í Hafnarfirði rís við Áshamar 9

Leikskólinn var settur saman á aðeins sex dögum – opnaði í byrjun apríl

Áshamar er leikskóli í Hamraneshverfi sem reistur var af fyrirtækinu Þarfaþingi hf. Bygging hans er ekki aðeins glæsileg viðbót við leikskólanet Hafnarfjarðarbæjar, heldur markar hún tímamót í byggingarsögu bæjarins. Áshamar er nefnilega fyrsti leikskólinn í Hafnarfirði sem byggður er með módúlabyggingaraðferð, þar sem forsmíðaðir módúlar voru settir saman á stuttum tíma með mikilli nákvæmni og skipulagi.

Leikskólinn er um 1.443 m² að stærð, hýsir sex deildir og getur tekið á móti allt að 120 börnum á aldrinum eins til sex ára. Hönnun hófst snemma árs 2024 og skólinn opnaði samkvæmt áætlun í byrjun apríl.

Módúlarnir: fullbúnar einingar og hröð uppsetning

Módúlarnir fóru í framleiðslu í byrjun september 2024 og komu til landsins í lok nóvember. Alls voru þetta 42 módúlar frá pólskum framleiðanda sem bárust til hafnar í Hafnarfirði föstudaginn 22. nóvember. Þarfaþing var búið að koma fyrsta módúlnum niður 27. nóvember og sá síðasti var settur á sinn stað aðeins sex dögum síðar sem sýnir hvað þessi byggingaraðferð getur skilað hraðri og skipulagðri uppbyggingu, ef rétt er farið að skipulagi.

Stærstu einingarnar voru allt að 12 x 4 x 4 metrar að stærð. Þær komu með öllu tilbúnu: gólfhiti lagður, loftræstikerfi og lagnir klárar – einungis eftir að tengja lokaútfærslur. Raflögnum var þegar búið að koma fyrir í veggjum og það eina sem stóð eftir var að draga að töflu og uppsetning lampa. Þessi aðferð tryggði mikla nákvæmni og verulega styttan framkvæmdatíma.

Verkefnastýring og skipulag lykilatriði

JTV sá um verkefnastýringu í heild fyrir Þarfaþing, sem fól í sér gerð kostnaðaráætlunar, verkáætlunar og náin eftirfylgni með öllum þáttum framkvæmda og hönnunar frá upphafi til enda. Mikla nákvæmni og skipulag þurfti til að tryggja samræmi í flutningi, uppsetningu og frágangi. Það hefur gengið eins og í sögu og leikskólinn tók á móti sínum fyrstu börnum aðeins fjórum mánuðum eftir að módúlarnir komu til landsins.

Barnvænt húsnæði og náttúrutengd nálgun

Leikskólinn við Áshamar er hannaður í L-laga formi utan um miðrýmið „Iðuna“, sem þjónar sem fjölnotasalur fyrir leik, sköpun og samveru. Deildirnar raðast tvær og tvær meðfram húsinu og hafa hver sína innganga. Þessi uppsetning stuðlar að skýrri skiptingu rýma og greiðu aðgengi að stoðrýmum. Öll hönnun miðast við þarfir barna – rýmin eru björt, litaglöð og hvetjandi, með stórum gólfsíðum gluggum og viðhaldslitlu efnisvali.

Byggingin er á einni hæð, með aðgengi fyrir alla samkvæmt kröfum um algilda hönnun. Rafdrifinn aðgangsbúnaður er við innganga og sérmerkt bílastæði eru fyrir hreyfihamlaða við hverja deild.

Leikskólinn við Áshamar er skýrt dæmi um hvernig nýjar byggingaraðferðir og framsæknar hugmyndir geta mætt brýnni þörf samfélagsins – og gert það með stæl.

Leikskólinn í Urriðaholti

Wed, 02 Apr 2025 14:47:47 GMT

Urriðaholti

Á haustmánuðum 2022 samdi Garðabær við Þarfaþing hf. um byggingu á 1.429 m2 leikskóla í Urriðaholti. Leikskólinn er að Holtsvegi 20 í Urriðaholti í Garðabæ og er 6 deilda leikskóli fyrir 124 börn. Byggingin er mestu ein hæð en tvær hæðir að hluta þar sem starfsemi leikskólans og leikskólabarna er á 1.hæð en aðstaða kennara og stjórnenda er á 2.hæð. Burðarvirki leikskólans var hannað sem steyptar undirstöður og steypt botnplata, en annað burðarvirki er úr krosslímdum timbureiningum (KLT) og límtrésbitum. Lóðin við leikskólann er einkar glæsileg en hún er 6.151 m2 og á leikhluta hennar er einstakt útsýni m.a. yfir Urriðavatnið sem er í nágrenni leikskólans. Að framkvæmdum loknum hlaut leikskólinn norrænu umhverfisvottunina Svaninn. Baldur Sigurðsson (JTV) sá um verkefnastjórn framkvæmdarinnar fyrir hönd Þarfaþings

JTV

Verkefnastjórn: Baldur Sigurðsson

Aðalverktaki Þarfaþing:

Framkvæmdastjóri Þarfaþings: Eggert Jónsson.
Verkstjóri: Birgir Haraldsson.

Verkstjóri: Einar Hafsteinsson.

Gæðastjóri: Ævar Sveinn Sveinsson.

Yfirsmiður: Árni Kristján Gissurason.

Verktakar:

Jarðvinna: Loftorka.
Burðarvirki KLT: Woodcon.

Pípulagnir: Kraftlagnir.
Loftræsting: Blikksmiðurinn.

Raflagnir: Raflausnir.
Smíðavinna: Þarfaþing, Al og Sér og M7 verktakar.
Gólf og loftadúkur: Pons.
Ísetning glugga og hurða: Auro verktakar.
Innréttingar: Pro Export.
Málun: OG Verk.
Múrari: Múrborg.
Klæðning: OSSN.
Þakfrágangur: Tambi.
Gróðurhús: Fagval.
Lóð: Garðyrkjuþjónustan. Svansvottunarfulltrúi: COWI

Hönnunarteymi:

Arkitektar og hönnunarstjórnun, Hulda Jónsdóttir hjá HJARK.

Burðarþol og verkfræðiráðgjöf, Arnar Björn Björnsson hjá exa nordic.
Lagnir og loftræstingar verkfræðiráðgjöf, Brynjar Örn Árnason og Almar Gunnarsson hjá Teknik.

Raflagnir verkfræðiráðgjöf, Kristín Ósk Þórðardóttir og Kjartan Rúnarsson hjá Lotu .

Landslagshönnun, Arnar Birgir Ólafsson og Anna Kristín Guðmundsdóttir hjá Teiknistofa Norðurlands.

Brunahönnun, Sigurður Bjarni Gíslason hjá Lotu.

Hljóðvistarhönnun, Kristrún Gunnarsdóttir hjá Myrru.

Framkvæmdastjórn sparar tíma og pening

Thu, 20 Mar 2025 08:00:26 GMT

Óhagkvæmt að eiga öll tæki

„Ég byrjaði einn með tómt borð en við höfum vaxið jafnt og þétt. Hingað til höfum við látið lítið fara fyrir okkur því við vildum sanna okkur og fá verkefni út frá orðspori okkar. Þannig stækkuðum við, af því það spurðist út hvernig við stóðum okkur,“ segir Jónas Halldórsson, stofnandi og forstjóri JT Verk sem breytti einmitt nafninu sínu í JTV nýverið.

„Þar sem við skiptum nýlega um nafn vildum við nota tækifærið og kynna betur okkar sérhæfingu sem er framkvæmdastjórn. Við erum leiðandi fyrirtæki í framkvæmdastjórn á Íslandi og leggjum höfuðáherslu á fagmennsku og gæði. Það skiptir öllu máli að vera með góða verkstjórn í framkvæmdum því það sparar bæði tíma og fjárhæðir til lengri tíma litið. Framkvæmdastjórn er eitthvað sem þarf að leggja mun meiri áherslu á á Íslandi því ávinningurinn af því að haldið sé utan um verkefni af fagfólki er gríðarlegur. Framkvæmdastjórn er virt fag víða um heim og stefna okkar er að leiða þá þróun hér á landi.“

Jónas segir að hann hafi fengið hugmyndina að því að stofna fyrirtæki fyrir löngu síðan enda hefur hann verið viðloðandi byggingariðnaðinn megnið af ævinni. „Ég var ekki nema um fimmtán ára þegar ég fór að smíða og síðar í verkfræði. Lengi vann ég á verkfræðistofu og í verkefnastjórn fyrir verktaka. Eftir að hafa verið í hönnunarstýringu í Hörpu ákvað ég að flytja til Noregs og fór í verkefnastjórnun hjá NCC. Mig langaði að prófa að vera hjá stærri verktaka til að kanna hvort vinnubrögðin erlendis væri sambærileg og hér og það var mjög góður skóli.

Það sem ég lærði mest á störfum mínum í Noregi var ákveðinn strúktúr og agi í verkefnum og þar fékk ég fleiri tól í hendurnar til að vinna með sem verkefnastjóri. Ég kynntist líka aðeins öðruvísi menningu á markaðnum þar því verktakinn átti engin tæki heldur leigði bara þau tæki sem þurfti, af því að það var óhagkvæmt að eiga öll tæki,“ segir Jónas og bætir við að annar mikilvægur lærdómur sem hann tók út úr dvöl sinni í Noregi var að verkefnastjórnun skipti mjög miklu máli og stór verktakafyrirtæki voru byggð í kringum verkefnastjórnun.

„Ég fann fljótt að þetta var eitthvað sem mig langaði að gera þegar ég kæmi til Íslands. Ég stofnaði JTV árið 2017 og í byrjun vorum við líka verktakar. En það varð svo mikið að gera í verkefnastjórnun, eða framkvæmdastjórn eins og ég kýs að kalla það, að við ákváðum að skerpa fókusinn og einblína á hana.“

Dæmi um verkefni sem JTV hefur framkvæmdastýrt á síðustu árum eru Sky Lagoon, Hótel Reykjavík Saga, nýr leikskóli í Urriðaholti, breytingar innanhúss á Seðlabanka Íslands og endurnýjun á sundlaug Garðabæjar.

Fagleg með vönduð vinnubrögð

Fyrir tveimur árum fór JTV í stefnumótun til að svara spurningunni hvert fyrirtækið vildi stefna og hvernig framtíðin liti út. Jónas talar um að þá hafi verið tekin sú ákvörðun að þau vildu halda áfram að gera það sem þau eru góð í: að verkefnastýra og byggja á þeirri aðferðafræði sem hefði nýst þeim vel hingað til.

„Við erum öguð, fagleg og með vönduð vinnubrögð. Við búum til strúktúr svo starfsfólk okkar hafi þau tól sem þau þurfa til að geta unnið vinnu sína á faglegan og vandaðan hátt. Ásamt því breytum við nafni fyrirtækisins og látum stefnu og vörumerki fyrirtækisins endurspeglast í útliti og markaðsefni.

Í febrúar opnuðum við svo nýjan og glæsilegan vef. Það sem hefur þó ekki breyst hjá okkur er að það er gott og reynslumikið starfsfólk sem er undirstaða starfseminnar. Stjórnendurnir okkar búa yfir þekkingu á öllum sviðum framkvæmda og við erum vel í stakk búin að stýra hvers konar verkefnum og framkvæmdum óháð stærð og umfangi. Við leggjum mikið upp úr aðferðum sem lágmarka framkvæmdatíma og kostnað og það er rík áhersla á gott utanumhald og eftirfylgni með verkefnum.“

Kunnum að bregðast við erfiðum aðstæðum

Aðspurður af hverju það sé svona mikilvægt að hafa góða framkvæmdastjórn í byggingarferlinu segir Jónas að afleiðingarnar af því að gera það ekki séu svo slæmar. „Í öllum framkvæmdum eru markmið okkar helst þrjú. Að skila á réttum tíma, að gæðin séu framúrskarandi og að ná þeim fjárhagslega árangri sem lagt var upp með. Þetta eru aðalatriðin en svo er vitanlega fullt af öðrum atriðum sem þarf að huga að. Ef byggingaraðili skilar of seint bætist kostnaður og kröfumál á hann. Gæðin þurfa að vera í lagi því við ætlum ekki að vera í mörg ár að laga á eftir okkur. Og svo vitanlega þarf að ná þeim fjárhagslega árangri sem stefnt var að. Með því að hafa góða stjórn þá eykurðu líkurnar á að þessi meginmarkmið náist.

Þegar við byrjum á verkefni erum við með tékklista hvað þarf að passa upp á, eins og samning, innkaup, öryggismál og þar fram eftir götunum. Þetta er langur listi af hlutum sem við þurfum að passa upp á þannig að við reynum að undirbúa okkur eins vel og við getum til að ná markmiðunum. Þetta gerum við með okkar tólum og tækjum enda er starfsfólk okkar þjálfað í þessu. Við þjálfum líka fólkið okkar upp í að vera ekki smeykt við að segja stöðuna eins og hún er.

Sama hve langan tíma verkefnið mun taka þá horfum við fram á við einu sinni í mánuði og reynum að sjá hvernig verkefnið endar. Það er nefnilega þannig að það kemur upp eitthvert vandamál í hverju einasta verkefni. Hvort sem það er innréttingar sem eru ekki til, verktaki sem mætir ekki eða jafnvel eldgos. En við vitum aldrei hvert vandamálið verður þó skipulagið sé upp á tíu. En við erum einmitt til staðar út af því, við kunnum að bregðast við í erfiðum aðstæðum og erum með alls kyns lausnir sem hafa reynst okkur vel.“

Velkomin á nýjan vef JTV!

Thu, 30 Jan 2025 17:02:05 GMT

Velkomin á nýjan vef JTV!

Nýr og endurbættur vefur JTV er kominn í loftið. Opnunin er stór áfangi en undanfarna mánuði höfum við lagt mikla vinnu í stefnumótun og endurmörkun á útliti fyrirtækisins. Vörumerkið endurspeglast nú vel í nýju útliti, markaðsefni og á vef.

Til einföldunar höfum við breytt nafni fyrirtækisins í JTV, sem leysir af hólmi JT Verk.

Markmiðið er að vefurinn sé skýr, þægilegur í notkun og gefi viðskiptavinum góða mynd af okkar þjónustu.

Stefnumótun og ný ásýnd JTV var unnin með Brú Strategy og vefhönnun með Klick .

Markmið okkar er ávallt að vera leiðandi fyrirtæki í framkvæmdageiranum. Við erum afar stolt af þessum áfanga og hlökkum til að stýra framkvæmdum áfram af öryggi með okkar góðu viðskiptavinum.

Smárabíó Max verður til

Mon, 25 Sep 2023 17:20:13 GMT

Max salur Smárabíós, sem býður upp á Flagship Laser 4K og Dolby Atmos, hefur slegið í gegn. Með breytingunum er Smárabíó orðið eitt af bestu bíóum í heimi og það eina sinnar tegundar á landinu.

JT Verk sá um byggingarstjórn verkefnisins.

Smárabíó Max verður til

Vönduð kostnaðaráætlun skiptir máli

Mon, 25 Sep 2023 17:19:11 GMT

Vönduð kostnaðaráætlun skiptir máli

Jónas Halldórsson, framkvæmdastjóri JTV, segir að fyrirtækið byggi á langri reynslu úr framkvæmdageiranum, þar sem meðal annars gerð og eftirfylgni kostnaðaráætlana sé veigamikill þáttur. „Með áætlun sem byggð er á þekkingu og reynslu minnka líkurnar á óvæntum uppákomum í ferlinu,“ segir hann og bætir við að gerð kostnaðaráætlana sé vandasamt verk.

Vönduð kostnaðaráætlun skiptir máli

Procore - glærur og upptaka

Mon, 25 Sep 2023 17:17:42 GMT

Það var góð mæting á samlokufundinn um pappírslausan verkstað. Jónas Halldórsson, byggingarverkfræðingur og framkvæmdastjóri JTV, sagði frá reynslu fyrirtækisins af innleiðingu og notkun á rafrænu, miðlægu verkefnastjórnunartóli, Procore forritinu. Einnig kynnti Catherine Agonis frá Procore forritið og möguleika tengda því.

Procore - glærur og upptaka

360° myndatökur – stórt skref í átt að tímasparnaði og hagkvæmni

Mon, 25 Sep 2023 17:06:10 GMT

360° myndatökur - stórt skref í átt að tímasparnaði og hagkvæmni

JTV tók nýverið í gagnið nýja tækni í myndatökum á verkstað. Um er að ræða 360° myndatökur með þar til gerðri myndavél en úr verða yfirlitsmyndir á sama formi og Google Street View 360° myndirnar sem við þekkjum í dag. COVID-19 faraldurinn var eitt af því sem ýtti undir þessa nýbreytni hjá JT Verk en hann kallaði á að færra fólk væri á verkstað hverju sinni.

„Við framkvæmdir er mjög mikilvægt að allir hlutaðeigandi viti stöðuna. Það þarf að vera hægt að staðfesta að framkvæmdin sé í lagi, að verkið sé á áætlun, hvað sé búið o.s.frv. Eins þarf oft að skoða einstakar útfærslur nánar og fleira. Það er líka mikilvægt að geta séð aftur í tímann hvernig framkvæmdinni var háttað því það reynist erfitt þegar búið er að loka öllum veggjum og loftum,” segir Jónas Halldórsson, framkvæmdastjóri JTV.

Það er mikið í húfi þegar kemur að byggingum og framkvæmdaverkefnum. Oft á tíðum eru þetta stór verkefni og mjög kostnaðarsöm sem þýðir að ef upp koma deilumál geta þau numið háum fjárhæðum. Með því að beita reglulegum 360° myndatökum til að staðfesta ferlið skref frá skrefi er því hægt að halda enn betur utan um hvernig staðið var að hverju verki fyrir sig, hver bar ábyrgð á því, hver tók það út, hvaða teikningar voru í gildi þegar það var unnið og svo mætti lengi telja.

„Þessi tækni gefur líka eiganda verksins góðan aðgang að mikilvægum gögnum eins og upplýsingum um staðsetningu lagna og búnaðar. Segjum til dæmis að það þurfi að gera breytingar á einhverju rými. Þá getur skipt sköpum að sjá nákvæmlega á mynd hvernig það var byggt,“ bætir Jónas við.

Allt frá því að myndatökur urðu mögulegar hafa verið teknar myndir af framkvæmdum. Með tilkomu stafrænna myndavéla og samhliða hraðri þróun á þeim fjölgaði myndunum til muna og núorðið er það ekki óalgengt að teknar séu þúsundir mynda í einu verki. Að halda utan um allar þessar stafrænu myndir getur reynst krefjandi og oft á tíðum seinlegt að finna nákvæmlega myndina sem leitað er að. Þess vegna er óhætt að segja að 360° tæknin sé stórt skref í átt að tímasparnaði og aukinni hagkvæmni við byggingarframkvæmdir. Ef teknar eru 360° myndir reglulega minnkar einnig þörfin fyrir viðveru ýmissa aðila á verkstað og möguleikinn á fjarfundum, þar sem farið er yfir stöðuna á skilvirkan hátt með aðstoð myndanna, opnast.

„Ég er viss um að 360° myndir og fjarfundir séu það sem koma skal í okkar fagi, þar á meðal fjarfundagerðir sem eru netupptökur af fundinum sem hægt er að nálgast síðar sem viðhengi inni í verkefnastjórnunarforritinu. Allt eykur þetta skilvirknina og minnkar kostnaðinn sem er náttúrulega alltaf megin markmiðið hjá okkur,” segir Jónas að lokum.

Pappírslaus verkstaður eykur arðsemi fyrirtækja

Sun, 24 Sep 2023 12:56:18 GMT

JTV sérhæfir sig í nýbyggingum, viðhaldi og stjórnun framkvæmda. Fyrirtækið notar lausnir sem lágmarka pappírsnotkun, auka líkur á hagnaði og hafa bætt stjórnun verkefna.

Pappírslaus verkstaður eykur arðsemi fyrirtækja

Fréttir

Sunnuhlíð hjúkrunarheimili Kópavogi – Endurbætur og stækkun

Góð stjórnun er ekki lúxus – heldur nauðsyn

Góð stjórnun er ekki lúxus – heldur nauðsyn

Góð stjórnun ekki lúxus heldur nauðsyn

Fyrsti módúlaleikskóli í Hafnarfirði rís við Áshamar 9 ﻿

Fyrsti módúlaleikskóli í Hafnarfirði rís við Áshamar

Fyrsti módúlaleikskóli í Hafnarfirði rís við Áshamar 9 ﻿

Leikskólinn var settur saman á aðeins sex dögum – opnaði í byrjun apríl

Módúlarnir: fullbúnar einingar og hröð uppsetning

Verkefnastýring og skipulag lykilatriði

Barnvænt húsnæði og náttúrutengd nálgun

Leikskólinn í Urriðaholti

Urriðaholti

JTV

Aðalverktaki Þarfaþing:

Verktakar:

Hönnunarteymi:

Framkvæmdastjórn sparar tíma og pening

Óhagkvæmt að eiga öll tæki

Fagleg með vönduð vinnubrögð

Kunnum að bregðast við erfiðum aðstæðum

Velkomin á nýjan vef JTV!

Velkomin á nýjan vef JTV!

Smárabíó Max verður til

﻿ Smárabíó Max verður til ﻿

Vönduð kostnaðaráætlun skiptir máli

Vönduð kostnaðaráætlun skiptir máli

﻿ Vönduð kostnaðaráætlun skiptir máli ﻿

Procore - glærur og upptaka

﻿ Procore - glærur og upptaka ﻿

360° myndatökur – stórt skref í átt að tímasparnaði og hagkvæmni

﻿ 360° myndatökur - stórt skref í átt að tímasparnaði og hagkvæmni ﻿

360° myndatökur - stórt skref í átt að tímasparnaði og hagkvæmni

Pappírslaus verkstaður eykur arðsemi fyrirtækja

﻿ Pappírslaus verkstaður eykur arðsemi fyrirtækja ﻿

Fyrsti módúlaleikskóli í Hafnarfirði rís við Áshamar 9

Fyrsti módúlaleikskóli í Hafnarfirði rís við Áshamar 9

Smárabíó Max verður til

Vönduð kostnaðaráætlun skiptir máli

Procore - glærur og upptaka

360° myndatökur - stórt skref í átt að tímasparnaði og hagkvæmni

Pappírslaus verkstaður eykur arðsemi fyrirtækja