Um er að ræða skemmtilegt verkefni í nýbyggingu leikskóla í eina BREEAM vottaða hverfi landsins, Urriðaholti. Leikskólinn er staðsettur við Holtsveg 20 og mun rýma sex deildir fyrir 124 leikskólabörn á aldrinum eins til sex ára. Burðarveggir og stoðveggir að jörðu verða staðsteyptir. Aðrir veggir auk hæðaskila og þaks verða byggðir úr krosslímdum timbureiningum (KLT). Útveggir eru ýmist klæddir með timbur- eða álklæðningu. Þak verður síðan klætt með torfi. Lóðin umhverfis leikskólann skiptist í aðkomu og bílastæði austan við byggingu og leikskólalóð vestan við. Leikskólinn er Svansvottaður og hefur starfsfólk okkar unnið gott og yfirvegað starf til að mæta kröfum Svansins. Þar má helst nefna byggingarefni, lóðarfrágang og verkferla framkvæmdar.
